الأحد، 20 أبريل، 2008

هروب


هربت مني بعد ما وصلتلي إحساس انها ممكن تحبني معرفش ليه عملت كده.....كانت ايديا حاضنه ايدها و سالتها ياتري مضايقه و كانت اجابتها ....لاقلتلها ياتري ممكن تحبيني ولا انا مفروض عليكي ؟ و سألتها و كنت مستني الاجابه منها صريحه قالت لأ.... ممكن احبك ......طب ليه بأه بعد فتره كبيره تختفي ....اسالها ليه مش بتردي عليا تقولي كنت نايمه او تعبانه او تليفوني كان مقفول....اقول اوكي....و لما احاول اخد منها اجابه صريحه عن حقيقة مشاعرها تقولي سيب الوقت هو الي يحدد...ياتري هو صحيح الوقت هيحدد ولا هيا بتندم انها سابتني امسك ايديها و احلم معاها بحب جاي يهز قلبي .......خايف تكون ندمت و مش عايزه تقول.....انا اصلي قلبي تحت ايدي يعني تكون احسن صريحه مش هموت .....بس أموت من تعليق المواقف يعني حاجه تكون حقيقه بس هيا خايف تكسر قلبي جايز............قلبي جامد مش هينقص منو حته.....بس احسن حاجه نفسي استريح....يعني افضل انها تقول الحقيقه ..انها مش بتحبني و لاهتحبني ...يمكن في اللحظه دي احبها ..علشان صريحه هتقولي خايفه تحب ولا خايفه ترتبط ....... جايز... بس الحقيقه ان دا مش ذنبي انا....وكمان ممكن تكون مش حقيقه ....يمكن تبرر لنفسها ندمها بأنها خايفه تحب او ترتبط حتي بشخص عارفه انو حبها......ماشي صحيح حبتها لكن ... عمري ما هفضل طول حياتي في سجنها .

هناك 18 تعليقًا:

غير معرف يقول...

مبروك عقبال مانشوفلك كتب باسمك

شادي أصلان يقول...

الله يبارك فيك وان كنت مش عارف مين ياريت الاسم المرة الجاية
ومستني المرة دي قريب

عاشقة القمر يقول...

....يمكن تبرر لنفسها ندمها بأنها خايفه تحب او ترتبط حتي بشخص عارفه انو حبها......ماشي صحيح حبتها لكن ... عمري ما هفضل طول حياتي في سجنها .

جامد جدا التعبير ده .. تقبل تحياتي ومروري المتكرر ..

شادي أصلان يقول...

ياااا التحيات طبعا مقبولة انما المرور دا شرف ليا مقدرش اقول غير بيتك ومطرحك ومستنيكي كل يوم

غير معرف يقول...

مع السلامة يا شادى الحب ده عايز القلب الشجاع اللى يقدر يستحمل ويعرف ياخد القرار
انا بحب المقال ده قوى
تسلم ايدك يا شادى
نجلاء

شادي أصلان يقول...

صحيح يا نجلاء الحب عايز القلب الشجاع
خصوصا ان مفيش ضمان لاي حاجه مش لازم حد من الطرفين يكون وحش او علي قدر ضئيل من المسؤليه لكي يفشل الحب
ممكن الحب يفشل لظروف خارجة عن ارادتة الطرفين ...بس دا مش معناه ان الناس تخاف او تبطل تحب....انا حبيت يبقي مخافش ولو فشل يبقي مش بسببي .
خلي بالك ان الي يخاف يحبك هو اكيد الخسران
شكرا علي مرورك يا نجلاء

د\أسماء علي يقول...

شادي
دي فضفضة عامية ..
حلوة لأنها من القلب ..
موضوع الحب والخوف من الحب المشكلة كده مااعتقدش انها في بطل نصك هتبقى المشكلة فيها أكيد ..

شادي أصلان يقول...

احتمال ..مش مهم المشكلة في مين هيا زي مانتي قلتي هيا فضفضة من القلب ... من الممكن ان تكون اقرب الي الهلاوس منها الي الفضفضة.

امال سامي يقول...

اكيد لو بتحبها هتعرف مشاعرها من غير ما تقولك
اللي بيحب حد بجد بيحس بيه وبيعرف هوا بيحبه ولا خايف من حبه ولا بيلعب بيه
كلام جميل واسلوب اجمل ومدونة جميلة وسلامو عليكو

شادي أصلان يقول...

امل سامي
مهي المشكلة اني عرفت مشاعرها وعرفت انها مش بتحبني
عليكم السلام

غير معرف يقول...

الحب مش بيجى بعد تفكير لانه احساس ارقى من كده بكتييير
واذا كان الاحساس الى جواك ده موصلهاش و متقدرش يبقى انت تستاهل احسن من
كده بكتيييييير
ضحى

مها يقول...

من احلى ما قرات ليك يا شادى
جميلة بجد احساسها عالى قوى

lih يقول...

.......خايف تكون ندمت و مش عايزه تقول.....انا اصلي قلبي تحت ايدي يعني تكون احسن صريحه مش هموت .....بس أموت من تعليق المواقف يعني حاجه تكون حقيقه بس هيا خايف تكسر قلبي جايز..........
احساسك حلو بالكلمات يا شادى
كلماتك بيكتبها القلم عشان تدخل القلب
ربنا يوفقك

مها يقول...

lih
دى انا يا شادى بس الكى بورد علق

dodi يقول...

هربت مني بعد ما وصلتلي إحساس انها ممكن تحبني معرفش ليه عملت كده.....كانت ايديا حاضنه ايدها و سالتها ياتري مضايقه و كانت اجابتها ....لاقلتلها ياتري ممكن تحبيني ولا انا مفروض عليكي ؟ و سألتها و كنت مستني الاجابه منها صريحه قالت لأ.... ممكن احبك ....


الحب مش فيه ممكن احبك وممكن لا
لو مش حست بحبك من ضمة ايديك لاديها يبقى عمرها ما هتحس بيه
عارفه انك كنت عارف ده انت كمان بس دايما الحب بيخلينا عندنا امل في حاجات مستحيله

شادي أصلان يقول...

حي كلامك مظبوط
-*--------------
مها اكيد مبسوط من كلامك بس كيبوردك كمان جميل لانه خلاكي تيجي مرتين
------------
dodi
صح ومقدرش اقول غير صح

ashraf يقول...

عزيزى شادى
ان الايام تجرى والانسان لايدرى والمؤلم فيها انها لا تعود.

يا ريت تجمع جميع المقالات الجميلة وتوضع فى كتاب جميل كده ومن دار الشروق يا عم والناس كلها حبابيك.
مزيد من النجاح ان شاء الله

maha يقول...

دايما بتقول أن الحب عايز قلب جامد..بس أنا بشوف أن العكس صحيح..كل حاجة فى الدنيا عايزة قلب جامد إلا الحب..لأنك لما هتحب معرض أنك تنجرح ومش بعيد الجرح دة يكون كبيير وممكن تفضل تعانى منه كتيير واحتمال أنه يخف لكن هتفضل مرارته جواك ماتروحش بسهولة..وكمان المشاعر دى مش سهل أبدا أننا نفرط فيها أو نعرضها للأذى ولو باحتمال بسيط لأن جرح المشاعر أكبر جرح..تقريبا هو الجرح الوحيد اللى مالوش دوا..رغم أنهم بيقولوا أن مفيش جرح ما تقدرش عليه الأيام لكن أنا بشوف أن الأيام متقدرش على جرح المشاعر أبدا