الأحد، 20 أبريل 2008

البلوفر


ركبت بجواره الميكروباص و كانت اول جمله له بمجرد جلوسي : الواد دا بيلعب حديد ذهبت بنظري يمينا و يسارا فلم اجد هذا الهرقل الذي تحدث عنه و لكني ابتسمت له وقلت: اكيد طبعا بيلعب حديد فكان رده:ده تباع من الي بيلمو الأجره أصل أنا بخاف منهم قوي و خصوصا أن الواحد منهم لو ضرب ايدو في صدرك هيكسرك نصين دا أنا حتي النهارده لسه واحد منهم شتمني رحت قايلو دا انا هـ.......... بس لما نوصل الموقف و بيني و بينك نزلت عند السنترال ( مع العلم ان السنترال يبتعد عن الموقف كثيرا ) اه اصل الواحد لازم يعرف امتي يعمل ميت و ضحك بصوت مرتفع مثل الاطفال و قالي بس خلي بالك كان هيتفرم لو نزلت معاه الموقف.سكت ظنا مني أنه انتهي من كلامه لتصعقني مفاجأه اخري اذا قالي لي : الواد عايز يديني البلوفر بـ 40 جنيه أنا حاولت اخدو منو بـ 20 جنيه بس هو مرديش بس هو بصراحه بلوفر لو جبتو من محل مش هيقل عن 100 جنيه انا بقي قلتلو 20 جنيه متعرفش ايه الي جرالو راح سألني انت بتشتغل ايه يا اسطي؟ رديت عليه جزمجي قالي اصلك ناصح اوي مينفعش خالص بـ 20 جنيه ‘ بس تعرف لو كان معايا سيجارتين حشيش كنت خدته منو بالبريزتين و مسيت عليه بالسيجارتين ( بضم السين ) كان هياخدهم و يسكت اصل خلي بالك العيال دي دماغها عاليه أوي قلتلو طبعا انت هتقولي .اقترب من اذني و قال لي بصوت يكاد يكون مسموعا انت عارف البلوفر الي انا لابسو دا بقالو كام سنه؟ قلتلو كام قالي اصل خلي بالك البلوفر دا واحد من اصحابي اول ما طلعة مكنة التريكو دي كان جايب كام واحده و عامل مصنع و قالي تعالي اعمل معاك واجب و اعملك بلوفر حاجه بأه شغل المعلم لأبنه همهمت ليكمل كلامه و انا اقترب من مكان نزولي و انا متخيل انه سوف يقول انه يمتلك هذه التحفه المصنوعه من التريكو من سنتان او ثلاثه لأجده يقول لي : بقالو ييجي تلاتين سنه اه والله انا عندي دلوقتي 47 سنه و البلوفر دا صحبي عملهولي و انا في الدبلوم قلتلو صحيح شغل المعلم لأبنو‘ في هذه اللحظه كنت قد وصلت فأستدارت و قلت له سلامو عليكم نزلت و انا اتابع السياره بنظري الي ان اختفت .

هناك 6 تعليقات:

عاشقة القمر يقول...

يالهوووووي 30 سنة ده مش شغل المعلم لابنه ده لو الورشة كلها اتلمت وعملته مش هيقعد كل ده ههههههه ..
ايه ده انا دخلت علقت على الموضوع من غير ما اقول مبروك الاول مش كده :)
مبروك يا شادي على البلوج وعقبال كده ما تبقى اجمد البلوجات اللي في الدنيا ..
على فكره عاشقة القمر على جوجل هي عبير عادل في ضربة شمس الفيس بوك :)
مبروك مرة تانية ..

شادي أصلان يقول...

الله يبارك فيكي
شفتي بأه 30 سنه ههههههههههه
ميرسي علي زوقك ومستنيكي كل مرة تعدي تقولي حاجه
عبييييييير عادي ضرب نار للضربشمساويين كلهم الي هيعدو هنا لازم احيهم بالجامد اوي

باسم شرف يقول...

مبروك البلوج يا ابوشادي
وحلوة قوي القصة دي
تسلم ايديك يا فنان
وصباحك قشطة

شادي أصلان يقول...

صباحك جميل يا عم باسم مرورك اسعدني جدا ومستني زيارات كتير منك

د\أسماء علي يقول...

حدوتة في لمحة ..
تلقائية جداا
...
باقولك ياشادي صحيح
عايزة بلوفر انا من شغل المعلم لابنه
الواحد مش ضامن السنين الجاية ياراجل ..

شادي أصلان يقول...

عنيا هستني الراجل وهاخد منة كارت واول ما اجيب الكارت هبعتلك اعرفك اني جبت العنوان يمكن اعمل واحد او اتنين معاكي