السبت، 27 سبتمبر 2008

نتكلم بليل


يأتي رمضان ويذهب ولكن تظل هناك بعض المظاهر التي تأتي دائماً مصاحبة للشهر الكريم فطبعاً بغض النظر عن العصبية والنرفزة والذي منه وصلاة التراويح والأعداد المهولة من المسلسلات ، سوف تجد الإعلانات التليفزيونية من أهم هذه المظاهر والأعراض المصاحبة لشهر رمضان ... إعلانات تذاع لمدة محددة هي ثلاثين يوماً في السنة ثم يتم التخلي عنها وإعدامها أو الأحتفاظ بها إلي العام القادم لأغراض غامضة لا يعلمها إلا الله ، حتي لو كانت فكرة الإعلان غير مرتبطة إرتباط مباشر برمضان وتصلح لأوقات أخري فسوف يتم التعامل معها بنفس المنطق تذاع شهر واحد ثم تختفي .
هذا العام هناك مجموعة من الإعلانات المميزة مثل سلسلة إعلانات " نتكلم بليل " والتي أعتقد أنها حققت نجاحاً كبيراً نظراً لإنها تعتمد علي بعض المفارقات المثيرة فعلا للسخرية ، وهناك إعلانات السخانات والبوتجازات التي قد يكون بعضها مبتكر ومختلف إلي حد ما .
ولكن الغريب أنه - وللعام الثاني علي التوالي - أصبحت هناك ظاهرة الإعلانات التي تعمل علي التقليل من هرمونات الذكورة لدي الشباب وبالتالي فهي تؤدي إلي زيادة نسبة العنوثة بين البنات ، ففي العام الماضي تجد سيناريو الإعلان يقول أن القطار بدأ في التحرك والشباب لا يفعلون شيئاً غير شرب الشيشة علي القهاوي ولعب الطاولة والدُمنة ( مبحبش أكتبها دومينو ) وبالتالي تكون النتيجة ان الشاب مش عايز يشتغل وان هو بردو السبب في ان حياته بقت ناشفة لأقصي درجة ولو حد تاني شايف حاجة غير كدا يبقي بيساعد في القضاء علي جيل كامل وهيكون ذنبه في رقبته ، لأن بطبيعة الحال القطار مبيستناش حد علشان كدا لو ملحقتش تشتري التذكرة بتاعتك مش هتلاقي مكان وهتفضل واقف مكانك أو ترجع تقعد تاني علي القهوة وتكمل نفس عشرة الدُمنة اللي كنت بتلعبها سواء مع شاب تاني ( بإعتبار أن الاولاني لحق القطر ) أو مع نفس الشاب لو كان زيك ملوش في السكة الحديد .
والسنة اللي إحنا فيها دي من الملاحظ أن هناك إصرار علي القضاء علي ما تبقي من العام الماضي ، فطبقاً لسيناريو الإعلان معدل إستهلاك الناس للطعام والشراب زاد بشكل أعلي من الأوقات الطبيعية ( مع أنها مبقاش فيها طبيعي وغير طبيعي ) علشان كدا بقي هو السبب الرئيسي في إرتفاع الأسعار .. تجد الرجل وزوجته يشترون من الطعام الكثير والكثر من الأصناف وتتطلب الزوجة كذا وكذا ... والزوج يبتسم لأن فلسوه هتخلص في السوبر ماركت ( دا طبعاً لأنه ركب القطر ) وفي النهاية لا يتم إستهلاك الطعام بالكامل فتقوم الزوجة برمي باقي الطعام علشان طبعاً محدش بياكل غير الأطعمة الطازجة ! ... وبالتالي الطلب علي الأكل يزيد مما يؤدي إلي زيادة الأسعار فتلاقي بردو نفسك في أخر الإعلان مضطر تفقد جزء تاني من أعز ما تملك ... هو إحنا صحيح بنستهلك أكتر من اللازم ولكن أن تصبح كثرة الإستهلاك هي السبب الرئيسي في الأرتفاع الجنوني في الأسعار فهذا شيء لا يصدقه عقل .يتبقي لنا أن نحمد الله أنه رحمنا من إعلانات الأشخاص إلي بيحبوا الصيف علشان بيلاقو ناس تلعب معاهم جولف ... ونحرص علي الدعاء بأن السنة الجاية إن شاء الله ما يتعملش سيناريو إعلاني يقول ان الناس الي بيوتهم بتتهد علي دماغهم مشكلتهم الأساسية إنهم ماركبوش القطر طبعاً وإشترو طعام أكثر من إحتياجتهم علشان كدا البيوت مستحملتش ضغط الأكل وقعدتهم الطويلة في المطابخ فريحتهم وريحت الناس منهم ووقعت علي دماغهم وساعتها أسف جداً أيها البنات يا الي زي العسل إني أقولكم متزعلوش يابنات إن قلنا بصراحة إن الجواز عمره .. عمره ماكان راحة .

هناك 30 تعليقًا:

الريم يقول...

اكيد مش حعمل زى الهبلة واقولك هيه انا اقول تعليق مش ممكن مش معقول حروح وارجع تانى والحركات ديه

بس حكون مبسوطة انى اول واحدة بقولك

كل سنة وانت طيب وعيد سعيد

ومتكلش كحك كتير عشان بيعمل تلعبك معوى

حمادة زيدان يقول...

والله يا شادي يا خويا أنا مش متابع للإعلانات أوى ... بس بجد الاعلان بتاع نتكلم بالليل فكرته جامدة جدا , بس والله الاعلانات مش شايف فيها حاجة ايجابية اهي كلها استهلاك للبني ادمين الغلابة ...

العيد قرب بقي وهتلاقي اعلانات السمن وكحك العيد على قفا من يشيل

M.Rabie يقول...

انا باضم صوتى لصوتك و باقوللهم " ماتحسبوش يا بنات ان الجواز راحة "

جميلة يابو شادى

كـــيــــــــارا يقول...

ممممممممممممممم

مش عارفه اقولك ايه انا لسه قاريه عن الاعلان ده برده من شويه

مفيش تعليق غير انهم بيبررو لنفسهم وبيجيبوا الحجه للناس

بس

....

كل سنه اونت طيب وميرسي علي تهنئتك بعيد ميلادي

اتمني التواصل الدائم

تحياتي كيارا

اه كان نفسي اكون اول تعليق عشان انا من عادتي انا واصحابي ان اول تعليق بيبقي ليه احتفال

سلاموز بقي :)

Unknown يقول...
أزال المؤلف هذا التعليق.
إبـراهيم ... يقول...

مــساءك فــل يا شادي بيه ...

عاجبني قوووي توارد الخواطر اللي حاصل ده، تاني حد أشوفه كاتب عن الإعلانات، إبقي عدَّي عليا شوف الموضوع اللي أنا كاتبه ....

نورني يعني :)

وبالمناسبة كمان كنت كاتب عن الموسيقى التصويرية، غير اللي إنتا كاتبه خااالــص طبعًا ، بس أهو توارد خواطر ....

خالص تحياتي
أنا إبراهيم طبعًا:)

مش مصطفى

غير معرف يقول...

من الملاحظ ياشادي ان الاعلانات السنه دي زادت بشكل رهيب و بقت اسخف
سواء بتاع السياحه و لا بتاع الكوكا كولا و لا بتاع نتكلم باليل
كل صاحب شركه اعلانات عايز يعمل الاعلان اللي ماتعملش ده بقه غير اعلانات السمنه النباتي اللي اساسا خطر علي الصحه و الناس للاسف بتجيبها و هي مش عارفه انها بتضر نفسها و عيلتها

كل سنه و انت طيب و عيد سعيد عليك و علي الاسره جميعا

حمامة يقول...

:D

الأول كل سنة وانت طيب
وعيد سعيد

الله الوكيل الواحد مرراته اتفقعت من الأعلانات السنة دى
فتلاقى كما لو ان مصر كلها بتروح تلعب جولف ف المكان الفولانى
وبتتسوق وتجيب ماركات عالمية ف المكان العلانى
وان المكان اللى مش عارفه اسمه ايه فى حياة لازم لازم ولابد انك تعيشها

كما لو انها تأكيداً ان حياتنا دى مش حياة

ده كوم والناس اللى بتبنى لمصر
من خير مصر

ولا حد شايف حاجة

ياريت الناس اللى بترمى الأكل دى تديه لبنك الطعام المصرى :D

وبعدين احنا بنتكلم كتير ليه
بقولك ايه يا شادى

نتكلم بليل :D

engy يقول...

انا معاك ساعات الاعلانات بتكون ظريفه
لكن فى المقابل فى اعلانات مستفزه
كل سنه وانت طيب
وكل سنه واحنا بنرمى الاكل علشان مش طازه
سلام

Maiada يقول...

تؤتؤتؤ
نسيت اهم اعلان السنادى
احسبها صح تعيشها فى تقشف
لسه كاتبة ردعلى موضوع عن الاعلانات دى ف مدونة تانى.وحاسة انى لو عدت الكلام هيجيلى انا ضغط مش هلحق اركب توكتوك....
ع الهامش هوالجواز فعلا عمرو مكان راحة

كل سنة وانت طيب ...

admin يقول...

علي فكرة يا شادي انا مستغرب ان في حد لسة بيتفرج علي التليفزيون في مصر بعد كم الهم والغم والقرف والكوارث اللي جابتها علي دماغنا حكومة الحزب الوطني

تحياتي

مصطفي النجار يقول...

بجد الاعلانات دي
مش هتزود مشكلة العنوسة بس
لا هتحل مشكلة الكثافة السكانية كمان
لانها فقع يجيب امراض
اعلام
اقل ما يوصف به
انه معتوه

حمامة يقول...

شادى معلش هاتقل عليك
بس ممكن لو فيها رخامه تبص على ده
عايزة اعرف رأيك جداً
بعد اذنك :)


http://dontbeabore2.blogspot.com/2008/10/blog-post.html

Alaa Abd El Hamid يقول...

ازيك يا شادى عامل ايه ؟
بمناسبه بقى موضوع الجواز والبنات والحاجات دى كلها يبقى لازم نفتكر كلنا اعلان
( آى أف يو )
الاعلان ده فيه حاجه استفزتنى جدا لما ابو البنت قام حضن الولد وقال له ( آى أف يو ) لمجرد انه معاه العربيه دى
ودا بيرسخ عند الناس موضوع العريس ابو فلوس
دا حتى يا أخى الولد ما كنش محتاح يجيب معاه أهله !!

كراكيب يقول...

وبعدين يا جماعه
هو مش رمضان خلص برده؟
والعيد اللي بييجي بعد رمضان ده الليهو الصغير اللي بيقعد 3 ايام ويمشي ,, مش خلص برده؟

طب لما يبقى في اي اخبار عن شادي يا جماعه قولو علشان هو كدة اتأخر اوي وممكن يكون مخطوف ومحتاج مساعدة واللا حاجة

miro el niro kwaniro

3ali يقول...

totally agree with you

by the way I worked in the advertising field for a while ,
msh hatsada2 mada el ehmal we elet el adab le mo3zam el wasat da

يا عزيزى , برامج , أفلام , اعلانات
كله (اعــــــــــلام موجه) !

عصر حريه اعلام مين , و الناس نايميين !

nice blog man

regards
:)

شادي أصلان يقول...

الريم
وانتي طيبة يااستاذه
بس والنبي بلاش تزعلي حد منك ملوش لازمة

شادي أصلان يقول...

حمادة زيدان
شوف ياحمادة يااخويا انا مش متباع زيك بس لما الموضوع يوصل لكدا يبقي لازم .... نتابع

شادي أصلان يقول...

موحا
صوتك مقبول يامعلم
:)

شادي أصلان يقول...

ابراهيم معايا
توارد خواطر معاك.....دا انا حظي حلو اوي
:))

شادي أصلان يقول...

اجندا حمرا
الاعلانات زادت علشان احنا كمان بقينا كتير واستهلاكنا زاد وبقينا عبارة عن سوووووق كبيررر

معلش مضطر اقفل ونتكلم بليل

شادي أصلان يقول...

حمامة
ال سلامة علي مرارتك .... فعلا حياتنا دي اسمها اي حاجة بس مش حياة

شادي أصلان يقول...

engy
ماشي انا موافق علي رمس الاكل الي مش طازة بس دا لما يبقي موجود اصلا !!!!

شادي أصلان يقول...

maiada
ال سلامة عليكي من الضغط وخلافة
هامش مقبول وكل سنة وانتي طيبة

شادي أصلان يقول...

emad
معلش يبقي بس لسة في ناس بتتفرج وبعدين الفضائيات كلها مليانة اعلانات مصرية وكأن مفيش حد بيتفرج علي التليفزيون يف الدنيا كلنا غيرنا
بذمتك مش غريبة؟

شادي أصلان يقول...

د/ مصطفي النجار
ربنا يسترها يا دكتور

شادي أصلان يقول...

حمامة
حاضر

شادي أصلان يقول...

علا عبد الحميد

تصدق فاتتني دي
العريس يدخل معاه فلوس وعنده افيو
يبقي اي اف يو

وتتجوز البنت العريس وابوها يحضنه ويركب العربية ويزيط
تصدق انا ناوي اكتب علي صدري ورقة مكتوب عليها اي اف يو يمكن تجيب نتيجة
؟:))))

شادي أصلان يقول...

كراكيب
ماشي ياميرو

شادي أصلان يقول...

3ali
ميرسي علي كلامك فيما يخص مدونتي
اما فيما يخص الوسط فانا معرفش
بس انت ادري بقي