الأربعاء، 8 أكتوبر، 2008

متعة إفساد المتعة


نتفق جميعاً أن لكل منا الدور الذي يلعبه في فيلم الحياة وبما أن مشاهد هذا الفيلم غير قابلة للإعادة فدائماً ما يكون هناك أشخاص نقابل بعضهم بمحض الصدفة وأحياناً يفرضون علينا كنتيجة طبيعة للدور الذي نقوم به .. هؤلاء الأشخاص يكون لهم تأثير كبير في جودة المشهد وبالتالي فهم قد يؤثرون في كل أحداث الفيلم من بدايته وحتي النهايته .

ولكن السؤال الذي يراودني باستمرار .. هل من الممكن أن يكون هناك فيلم بدون موسيقي تصويرية ؟ أعتقد أن هذا شيء مستحيل وبالتالي فأنا لدي قناعة بأن لكل منا الموسيقي التصويرية المصاحبة له في حياته ، قد تكون تلك الموسيقي أغنية أو أكثر وتختلف طبقاً للشخصية التي يلعبها كل واحد منا فالشخص الذي ستكون موسيقي منير هي المصاحبة له مثلاً سوف يكون مختلف شكلاً وموضوعاً عن الشخصية التي تأخذ من أغاني محمد فؤاد موسيقي مصاحبه لها طوال فترة الفيلم !

وبما أن الموسيقي التصويرية سوف تؤثر علي مشاهدين الفيلم الذين يلعبون أدوارهم أيضا في نفس الوقت فقد تكون الموسيقي التصويرية التي تختارها لدورك سبب في تغيير بعض تصرفات الشخصيات الأخرى التي تنعكس بدورها لتؤثر في أحداث الفيلم نفسه ، كما أنك سوف تجد بعض المحاولات للتطفل علي موسيقاك ومحاولة تغيريها طالما كانت دورك في الفيلم مؤثر وهنا سوف تجد أن نتائج تلك المحاولات من شأنها إفساد متعتك بلعب دورك في الحياة لأنه سيكون دور صامت بدون تفاعل وتناغم مع باقي فريق العمل ، وكما يحدث في الأفلام وأنت منهمك في أداء مشهد معين ويصاحبك صوت الملك ستجد شخصيات شريرة ( حلوة شريرة دي ) تجد متعتها في إفساد إستمتاعك بهذا المشهد ، ستسمع كلمات علي غرار ماتغير ياعم الأغنية دي أو أنت بتسمع الأغنية دي علشان هي بتحكي عن حاجة حصلتلك وكأن التطفل علي طريقة أداء البشر لحياتهم حق متاح لكل المشتركين في الفيلم دون النظر لهذا الشيء المسمي بالحرية ، فجأه تجد حياتك أصبحت مشاع للجميع من حق كل شخص أن يعلق ويبدي رأيه حتي في أبسط الحقوق الشخصية التي تتمثل في إختيارك نوع الموسيقي التصويرية لحياتك .بمجر الوصول للمرحلة التي تجد فيها أقرب الناس إليك غير قادر علي إستيعاب موسيقاك ويسعي لتغيريها أو إخمادها ستجد نفسك تسعي أنت الأخر لتغيريها ولكنك ستكتشف الحقيقة المتمثلة في أن تلك الموسيقي هي أنت وأي تغيير فيها هو في حد ذاته عبث وتغيير في ذاتك وبديهي جداً أن يؤدي هذا إلي فقدانك دورك في حياتك وتهميشك تماماً ، لكل ذلك قم بتشغيل موسيقاك في الام بي ثري بتاعك ( إلي هو جواك يعني ) وخلي صوته عالي أوي وغني معاه علشان تفضل علي طول بطل فيلمك وساعتها بس هتلاقي كل الناس الي كانت رافضه دورك مقتنعين تماماً بكل حركة وكلمة بتقولها وتأديها ولما ينزل تتر النهاية هيكون أسمك منفرداً كما يليق ببطل وليس كومبارس .... صامت .
ضربة شمس ( جريدة الدستور 24/9/2008 )

هناك 34 تعليقًا:

كراكيب يقول...

فظييييييييعه
بس اشمعنى محمد فؤاد؟؟
وانا مالي وانا مالي
المهم انها فظيييييييييعه
مختلف مخــتلف

وفكرتني كدة بـ ماما وهي رافضة كل موسيقى تصويرية في حياتي
اذا كنت مشغلاها او معلقاها في دولابي او نازلة رايحالها حفلة او انا نفسي بغنيها
مع اني عمري ما تدخلت في موسيقتها التصويرية لإني اصلا معرفش هي ايه
مااااااااعلينا

كلمة كدة بيقولوها الناس عايزة اقولهالك
دمت متألقاً :)
"اصل انا مش واخدة على الكلام باللغة العربية"

miro el niro kwaniro

د / مصطفي النجار يقول...

فأنا لدي قناعة بأن لكل منا الموسيقي التصويرية المصاحبة له في حياته
نعم يمثل كل شخص
سمتا مختلفا عمن حوله
وكل من يخالط هذا الشخص
ويحتك به يسمع لصوت موسيقته
المؤسف ان هناك اشخاص موسيقتهم حزينة علي الدوام
واشخاص اخرون موسيقاهم مزعجة
ما علينا فعله ان نتخير موسيقانا
لتكون مناسبة لكل موقف
بدون اقنعة نرتديها
وبدون تلون اوتملق
تحياتي

ســـــــهــــــــــر يقول...

ولكنك ستكتشف الحقيقة المتمثلة في أن تلك الموسيقي هي أنت وأي تغيير فيها هو في حد ذاته عبث وتغيير في ذاتك وبديهي جداً أن يؤدي هذا إلي فقدانك دورك في حياتك وتهميشك تماماً



من غير مجامله بحس ساعات انى انا اللى بكتب الجمل دى
خصوصا اما بتتكلم عن الحريه الشخصيه و محاولات الاخرين افسادها


رائع انت فى تصويرك و كلامك عن الموسيقى التصويريه الداخليه اللى حقيقيه جدا

اقولك كمان
انت فوقتنى قبل موسيقاى الداخليه ما تهرب منى بلا رجعه

!!! عارفة ... مش عارف ليه يقول...

رائع يا شادي

الفكرة حكاية
وهي البطل الحقيقي في البوست بغض النظر عن روعة الصياغة وتسلسل الأفكار وصولاً للنهاية

--------------------
نيجي بقى للموسيقى التصويرية بتاعتي لان موضوعك فتح نفسي للرغي شوية
وهي تقدر تقول علي الحجار واعتقد ده واضح من اسم المدونة عندي
وبيشاركة البطولة منير والبطولة النسائية لحنان ماضي وأنوشكا

هقولك على حاجة كده فيها سواسة
برة الموضوع لما بتعرف على حد لأول مرة بسأله بتحب تسمع مين

علشان اعرف هيكون في لغة حوار بيني وبينه ولا لأ

معلش رغيت بس اعتقد إن موضوعك هو السبب اللي خلاني فتحت في الكلام


حقيقي برافوااا
وليد

وجه جديد د.أحمد عثمان يقول...

رائعة تلك الفلسفة
فالموسيقى حياة
هوية
و هناك محترفو طمس الهوية
في الحياة
كمن حوّل "حب ايه" ام كلثوم
الى حب ايه محمد سعد
تلك هي متعة افساد المتعة

حينما يعلو صخب الجاز
لا يملك النهاوند سوى الانتحار
أو الاندثار


تحياتي

هويدا صالح / عشق البنات يقول...
أزال المؤلف هذا التعليق.
هويدا صالح / عشق البنات يقول...

شادي
هل تعرف فكرة الإيقاع الداخلي ؟
أعتقد وأتفق معك أن هناك موسيقى تعزف دواخلنا ولكل منا خصوصية شديدة في الموسيقى التي يعزفها لذاته ...
كنت اشاعد فيلم عن الرقص الحركى والإيقاعي والمودرن دانس
وكانت إحدى أشهر الراقصات الأمريكيات في المودرن دانس لا يذكرني اسمها الآن لأني سهرانة طول الليل وصاحية بدري مش مهم ..
المهم كانت تدرب فرقتها على الرقص بدون موسيقى
وكان التيم كله يرقص رقصات متناغمة ومنسجمة وكأنهم كورد باليه متوافق دون موسيقى
وحللت الظاهرة فأرجأتها للإيقاع الداخلي ...
لما كتبت قصة فلامنجو بقدمين عاريتين كنت أقصد أيضا هذا المعني ...
فالفلامنجو يحتم وجود إيقاع مع كعب عال تدق به الراقصة
ولكن بطلة سردي كانت تدق الأرض بكعبين عاريتين وبدون إيقاع إلا إيقاعها الداخلي ....
شادي فكرتك هايلة ولطيفة ...
بحب الحاجات اللي مش في الحاجات واللي بتكسر إيقاع الحاجات ...
بقول إيه يا أستاذ
مش عايز تاخد رواية ملاك الفرصة الأخيرة ولا إيه ؟
ليك نسخة يا عم
ولا عايز تشتريها بفلوسك يعني ولا إيه ؟
صباحك زل الفل

هويدا صالح / عشق البنات يقول...

شادي أرسلت لك تعليق مكرر فحذفت واحد
صباح الجمال علي عيونك

shasha يقول...

جميل تشبيهك بان دور الانسان فى الحياة مثل الموسيقى التصويرية لاحد الاعمال الفنية

لا غنى عنها

واعتقد من حق كل انسان الاحتفاظ بموسيقته الخاصة رغم عن انف الجميع

ولكن شادى

ماذا اذا كانت موسيقاه مزعجة الى حد

ازعاج الاخرين اعتقد فعليه اخمادها

او محاولة تغيرها

بوست رائع

دمت بخير

Shaimaa Zaher يقول...

جميل يا شادي، لازم كل واحد يعزف الموسيقى التصويرية بتاعته وأظاهر يعني كل لما بيقابلك ناس عشان يغيروها يقوم الواحد ما يغيرش الموسيقى ويفضل يسمعها ويعزفها

تحياتي

اجندا حمرا +Heart Beat يقول...

مقاله مميز اشكرك شادي انك نقلته لينا
انا شخصيا ماقدرش اعيش من غير موسيقي لأن اد كده تأثيرها بيكون كبير ممكن تغير موود اليوم كله
عشان كده تلاقينا بنسمع اغاني فريحي وقت مابنكون فرحانيين و اغاني حزينه وقت مافيه حاجه بتكون مضايقانا و دايما فيه اغاني مرتبطه معانا بمناسبات معينه
تحياتي ليك شادي

كلام وخلاص يقول...

التصميم على دور البطولة فى الفيلم يضمن نجاحه
لازم نختار الموسيقى التصويرية بعناية لنبقى من نحبهم فى الجوار
المشكلة بتكون لما انت ذاتك ما تبقاش عارف نوع موسيقاك ساعتها بتبقى صيد سهل للحواليك يجربوا فيك
عن نفسى اختار فيروز تغنى بصوت عالى
على فكرة انا باتابع المدونة من زمان عن طريق مدونة باسم شرف وهى مدونة جميلة فعلا
سلام

بسنت يقول...

الاول كل عيد وانت سعيد
----------------------
وبعدين
احيان كتير بتكون الحياه اهدى بدون موسيقى تصويريه -- دا من وجهه نظرى طبعا --- لان الموسيقى دا غالبا بتكون مش مظبوطه على نص الحياه ففى الاخر بتفسد مش اليوم دا بس لا كل اللى يمكن رتبته وعملته علشان تشوف النتيجه
يمكن تكون بفعل فاعل او مجهوله الفاعل
بس هى عندى بتكون احسن بدونها خالص
يعنى تقدر تقول ما بعتمد عليها
ومتهيألى مش غريبه يعنى لما تشوف مسلسل بدون الموسيقى التصويريه
يمكن يتفهم احسن بدون المؤثرات دى
اما اذا كانت داخليه فكدا هتكون غير معلنه طبعا لباقى الناس
فى الحاله دى هتكون انت الوحيد اللى هتحطها هنا يمكن اتقبلها بدون ازعاج بردوا

سلمت

مها يقول...
أزال المؤلف هذا التعليق.
مها يقول...

الجميل اصلان
بتعجبنى موسيقاك التصويريه
بس عارف حتى لو فى اكتر من واحد بيجتمعوا على نفس الموسيقى التصويريه لافلامهم
هناك ايقاع مختلف لنفس الموسيقى فى اذن كل منهم
فتلك افلامنا
وتلك موسيقانا
حتى لو كان نفس اللحن
فلابد من وجود اختلاف

كراكيب نـهـى مـحمود يقول...

شادي عارف
لما بتحاصر بنوع من الناس بيتكلم بلغه العالم ببواطن الامور
ويفرض وصايه ملوس اي حق فيها
بحس انه بيلعب على درجة تصديقي انا لنفسي لموسيقتي اللي اخترتها
لو اتهزت الثقه دي جوايا لو فكرت في تغيرها ابقى شفت لاي درجة انا مش حقيقي

عارف الحياه وقبلها الناس علمتني الا اثق الا في لحني الخاص
دمت مبدع

yamen يقول...

احييك جدا

يا اخي الموضوع ده اداني شحنة قوية كده من الرغبة في الحياة والمقاومة
بعد ما كنت قربت اقفل الام بي ثري بتاعي خالص

بجد متشكر

تحياتي مرة اخري

شادي أصلان يقول...

كراكيب
محمد فؤاد علي سبيل المثال لا الحصر
عادي خلي ماما ترفض الموسيقي التصويرية بتاعتك وانتي اقفشي فيها
وميرسي علي مجاملتك باللغة العربية

شادي أصلان يقول...

د / مصطفي النجار
متفق معاك تماما ان هناك أشخاص موسيقاهم مزعجة بس انا بديلهم الفرصة لان دا حقهم ودورهم انهم يزعجو خلق الله .
:)

شادي أصلان يقول...

سهر
أولا من دواعي فخري انك تحسي بمشاركتي كتابة الكلام دا
ثانيا الحمد لله انك لحقتي الموسيقي بتاعتك
ثالثا زيارتك دايما بتشرفني

شادي أصلان يقول...

عارفة ... مش عارف ليه
بالعكس انت ترغي زي ما انت عايز يامعلم
وبجد عاجز عن الشكر عن كلامك في شخصي الضعيف

شادي أصلان يقول...

وجه جديد د / أحمد عثمان
صحيح هناك محترفو طمس هوية وتلك هي متعة افساد المتعة

وتحياتي انا كمان

شادي أصلان يقول...

هويدا صالح

تحليلك للموضوع أبهرني
وكلامك عن الانسان الغلبان الي هو انا يزيدني غرورا
وبعدين طبعا عايز ملاك الفرصة الاخيرة
ولما يكون ليا نسخة لازم اخدها في اقرب فرصة
ولو مليش هشتريها وأمري لله
:))

شادي أصلان يقول...

shasha
غذا كانت تلك الموسيقي مزعجة الي حد ازعاج الاخرين
متغيريهاش غير اذا كان الازعاج دا بيعود عليكي
لانهم ممكن يكونو منزعجين لانها صح بالنسبة ليكي

شادي أصلان يقول...

شيماء زاهر
ميرسي اوي واتمني ان الزياة تتكرر كتير اوي
:)

شادي أصلان يقول...

أجندا حمرا
صح ممكن الموسيقي تتغير حسب الموود والمناسبة وصح أوي كمان
:))

شادي أصلان يقول...

كلام وخلاص
مبسوط من طريقتك في تناول الكلام التصميم علي لعب دور البطولة حاجة مهمة اوي بس بتكون فعلا المشكلة في معرفة نوع الموسيقي المناسبة
وطبعا متابعتك للمدونة بتاعتي من دواعي سروري

:))))

شادي أصلان يقول...

بسنت
هقولك علي حاجة حاولي تجربيها

شغلي فيلم عربي او اجنبي مش هتفرق كتير ووطي الصوت علي الاخر وشوفي هتحسي بايه .

شادي أصلان يقول...

مها
الجميلة مها رؤيتك للموضوع حلوة بجد صح اوي اوي وكمان اوي
ان ممكن نتفق علي اللحن بس أكيد التوزيع هيكون مختلف .

شادي أصلان يقول...

كراكيب نهي

شفتي نهي أوهو من غير أستاذة :)

جميل أوي ان الواحد منا يكون واثق في لحنة الخاص لانه ساعتها بس هيعرف ازاي يشغله صح ودا هيسهل حاجات كتير اوي

المدونة وصاحبها بيفرحو اوي لما بتيجي عندهم
:)

شادي أصلان يقول...

yamen
ربنا يخليك
متتخيلش كلامك دا عمل فيا ايه بجد
شكرا ليك انت .

eshrakatt يقول...

انت رائع يا شادى رائع بجد

فكرة الايقاع الداخلى الشحنه الايجابيه الطاقه الى بتمنع الاختراق الخارجى للمنظومه الداخليه للبشر الصلابه الاحتفاظ بالهويه الداخليه للشخص والى بتاهلك للانسجام مع الاخر من خلال اطار انت الى بتحدده
دورك فى مسرح الحياه فعندما تتفق وتنسجم الموسيقى الداخليه لفرد مع الاخر يحدث الانسجام او التواصل والاكتمال وعندما تختلق فاما الاختراق او النفور

غريبه جدا النفس البشريه والقدرات الهائله الى بتمتلكها وللاسف لم يتم اكتشافها حتى الان

دائما تصيب العمق يا شادى
اوجزت فانجزت

رائع جدا وبصدق

بجد سعيده جدا لمرورى

وسعيده اكثر بزيارتك

اشرقت

شادي أصلان يقول...

اشرقت

نورتي الدنيا بجد
انا سعيد اننا نتفق في وجهات النظر

ومتفق معاكي في ان النفس البشرية مليانه حاجات لم يتم اكتشافها الي الان


كميرسي اوي لذوقك وسعيد بزيارتك ويارب تنوريني دايما
:))

arab girlscool يقول...

This is such a nice addition thanks!!!
شات صوتي شات صوتي
عرب كول
شات صوتي مغربي
دردشه صوتيه
انحراف كام
منتديات منتديات عرب كول
غلا الروح
شات غلا الروح
شات صوتي
شات مغربي