الثلاثاء، 15 يوليو 2008

هي الحياة تستاهل ؟!

إبن الأنسان ( الفنان البلجيكي رينيه فرانسوا )

ياعم الحياة متستاهلش متعملش في نفسك كدا .. هكذا يكون التعليق دائما إذا ما لاحظ أحد الأصدقاء الحالة التي أكون متورط فيها أحياناً وهي الصمت وعدم الرغبة في الكلام ’ طبعاً غالبا ًما يكون لي أسبابي وبغض النظر عن درجة أهمية هذه الأسباب من عدمها فهي بالنسبة لي كافية جداً لكي أكون في تلك الحالة .
تستفزني جداً تلك الجملة وتكون إجابتي .. لأ الحياة تستاهل أكتر من كدا كمان لسبب بسيط جداً ألا وهو أن الحياة مبتستناش حد .. نعم هي حياة واحدة تكون في بدايتها كالصفحة البيضاء كل شخص يخط فيها ما يريد فالتصرفات هي الحروف والأفعال هي الجمل التي يقوم كل شخص منا بكتابتها في صفحتة ’ صحيح أن هناك عوارض قد تغير من الخطط التي ننوي تنفيذها ولكن نظل نحن وحدنا المتحملين لمسؤلية أي كلمة أو عبارة نخطها في ورقاتنا .
فكثيراً ما نقابل أشخاص ونؤمن بهم أو هكذا نعتقد ونتبعهم ونأخذهم شيوخاً لنا ولكن بعد المشي علي دربهم نجد أننا قد ملئنا جزء من صفحة حياتنا - التي لم تعد بيضاء كما كانت - بوجهات نظر مضللة لا تمت لنا بصلة نتمني لو نعود ونتخلص منها ومنهم نهائياً ’ ولكن - وللأسف - فهذه الجمل والعبارات تكون محفورة وبارزة في الورقه فلا نستطيع التخلص منها ولا نستطيع الرجوع لتغيريها وياليتها كتبت بالقلم الرصاص ففي تلك الحالة فقط قد نستطيع محوها .
يصير الكلام أكثر جدية إذا أقتنع كل منا بأن تلك الورقة ملك له ... وبما أنك تتحمل مسؤلية المواقف المترتبة علي الكتابة في ورقتك الخاصة فيجب أن تعرف أن المرجعية الأساسية لتلك المسؤليه هي حريتك في إختيار ما يُكتب ... هنا فقط يكون تحملك لتلك النتائج منطقي ولا تستطيع أن تلوم الا نفسك علي ما حدث وما ترتب من نتائج .
فكيف ينظر اليك شخص لإستغراقك في أمر من أمور حياتك مهما كان ويقول لك بكل بساطة ياعم الحياة متستاهلش كدا .. أعتنق هذا الشخص أي منطق وأي وجهة نظر لكي يقول هذا والغريب أنه يريدك أن تنساق وراء هذا الكلام وتتحول بقدرة كلامة إلي النقيض تماماً وتبتسم وتنسجم معه في أي كلام أخر ... فإذا تشبثت بحقك في تحري الدقة في خطواط حياتك أصبحت في وجهة نظره شخص مليء بالعقد والمشاكل ولن يكف عن مواجهتك بذلك .لكل ذلك أعلم جيداً أن الأشخاص من هذا النوع ليسو حقيقيين وأعلم أيضاً أنهم يعرفون جيداً أن طريقتك في التخطيط لحياتك هي الصحيحة ولكن لأنهم يعجزون عن تحقيق ذلك فدائماً ما يحاولون دفعك لكي تهوي الي بئر التردد والتخبط والضياع وإذا نجحوا في ذلك .. عندها فقط ستعلم أنك قد قمت بكتابة أخر سطر في صفحة حياتك ودون أن تدرك أن هذه هي النهاية .




ضربة شمس ( جريدة الدستور 9/7/2008 )

هناك 51 تعليقًا:

د\أسماء علي يقول...

يااااااه
أولا تصدق يا شادي وحشتني مدونتك
بغض النظر إن صاحب المدونة برضه كده
..
ثانيا
آه الدنيا تستاهل جداااا
بس أنا وصلت فترة لحالة لامبالاة و نظام مش فارقة
و كانت وجهة نظري وجيهة جدا اوي خالص
اللي هي ايه بقى ؟
إن مش هيروح أكتر من اللي راح
واكتشفت إن بسبب اعتناقي الحليوة لمبدأ مش فارقة راحت مني حاجات كنت مش واخدة بالي منها
...
الدنيا دي زي رحلة بحث كبيرة
لازم تستمتع وتفكر وتدور
...
على فكرة قريته من يوم مانزل
.......

عاشقة القمر يقول...

وبغض النظر عن درجة أهمية هذه الأسباب من عدمها فهي بالنسبة لي كافية جداً لكي أكون في تلك الحالة .

بجد عجبتني اوي الجملة دي .. عجبتني جامد يعني .. لانه فعلا بغض النظر عن درجة اهمية ولا فظاعة الحاجة اللي بتخلينا في حالة مش تمام فكفاية جدا ان مجرد احساسي بيها مخليني عامل كده ..
بوست حلو اوي يا شادي وزي ما قولتلك قبل كده اني وانا ماسكه الجرنال وبقراه كنت حاسه انك مكشر وبتزعق حتى انا من كتر ماركزت فيه بعد ما خلصت قرايه لقيتني مكشره وانا مش واخده بالي :)
انا رجعت جيت تاني بدري اهوه عشان تعرف بس ان المرة اللي فاتت دي كانت ظروف بس مش اكتر .. انت عارف ماقدرش اتأخر ..

Omnia يقول...

صحيح يا شادي ان الدنيا..دنيا من الدنو..وأنها لا تساوي جناح بعوضة..
لكن انا معاك جدا أن من الغباء اننا نقول مش فارقة وعادى..

لا طبعا مش عادى لأن أخطاءنا زي ما قلت مش بتتمسح..ومش بتتغير ..
فكرتني اوى بتصويرك للدنيا بصفحة..
أن ربنا يوم القيامة حيأمر كل واحد أنه يقرها صحيفة أعماله...

ياااااارب تكون سطورنا وجملنا محترمة ..منتمناش يومها أنها فعلا تكون رصاص و اتمسح

تحياتي لتصويرك الى خلاني أسأل نفسي عن كل السطور الى مكتوبة في ورقتي :)

أحمد عبد اللطيف يقول...

الصديق شادي
اعتقد أن لكل منا حياته التي عليه أن يصنعها بنفسه ، وأن يفرح بما صنعه ويحزن علي ما فاته ، ويحاول من جديد ، وتستمر الحياة كفاحا متواصلا لا راحة فيها ، مع ذلك لا أؤمن بكلمة ندم ، فالحياة عندما تغلق بابا ، تفتح مئة نافذة ، فقط علينا ان ندير وجهنا لنري النافذة التي تناسبنا .
تحياتك لك

إنجى يقول...

فعلا .. الحياه تستاهل اكتر من ما نتخيل
المهم التخطيط زي ما تفضلت وقولت

خطط لحياتك صح
احسب حساباتك صح

علشان التمن هايكون عليك
صح؟

بوست روعة

تسلم ايدك وقلمك

تحيتى

شادي أصلان يقول...

سمسمة صديقتي الجميلة أوي
اولا : طبعا مصدق ان مدونتي وحشتكك لانك انتي كمان وحشتيها ووحشتي صاحبها كمان .
ثانيا سعيد أوي انك تأكدي كلامي بكلامك لان دا يديلة مصداقية اكتر طبعا .
وطبعا عارف انك قريتيه اول ما نزل
متتأخريش عليا بليييييز

شادي أصلان يقول...

عاشقة القمر
وجودك في حد ذاته واعجابك باكلام دا جميل
اما الاجمل انك كشرتي لان التكشيرة دي ان شاء الله هتخليكي متكشريش تاني خالص مش كدا بردو ؟ !!!

شادي أصلان يقول...

أمنية
دايما وجودك بيسعدني

هي الدنيا من الدنو
جميل
ومتفق معاكي انه من الغباء اننا نقول مش فارقة عادي
اما بالنسبة لصفحتنا انها تكون محترمة
اميييييين

شادي أصلان يقول...

أحمد عبد اللطيف
صديقي متفق معاك تماما ان لكل انسان حياتة يصنعها كما يشاء
اما عدم اقتناعك بالندم فأنا اختلف معاك فيه لان الشعر بالندم بيكون وسيلة لدفعك انك متندمش تاني مش كدا بردو؟!!

شادي أصلان يقول...

انجي
خطط لحياتك صح
احسب لحياتك صح
علشان التمن هيكون عليك صح؟

صح الصح كمان
زيارتك جميلة اوي اتمني انك تكرريها كتير اوي اوي
تسلمي وتحياتي انا كمان

كراكيب نـهـى مـحمود يقول...

طبعا الحياة تستحق
كانت هي اجابتي البديهه على العنوان
عندما قرات الموضوع ابتسمت لانك تتبنى ذات وجهه النظر
تعرف؟
الحياه ليست فقط بها صفحاتنا البيضاء التي نملاها بايماناتنا واحلامنا
اخطائنا ايضا تبدو جميلة لانها توضح كيف يمكننا التجريب والعبث والندم
مفردات مؤلمة جميله لانها نابضه بكل ما تستحق الحياه ان نجربه عنها وبها
مودتي

الريم يقول...

ايه موضوع وحشنى ووحشتنى ده يا جماعة فى موبيلات للحاجات ديه انا كنت داخلة اكتب تعليق بس موضوع الوحشان ده استفزنى بجد اول مرة اقرا تعليقات بالمنظر ده

دعاء مواجهات يقول...

صباح إستثنائى آخر حاجة

لأخ جميل ومدونة أكتر جمالا ً إفتقدتها الفترة الماضية لظروف سفرى.. خارج مصر

الموضوع فعلا جامد ومهم انك تكون واخد كل حاجة على أعصابك وبتهتم بتفاصيلك ويجى حد يقولك ياعم كبر مفيش حاجة تستاهل..

طبعا شئ يغيظ اوى

انا طبعاً معاك فى ان اللى يسمع كلام ناس كدة وينساق وراهم هينهى قصتة بنفسة ..

بس أحيان كتير بردو بيكونوا الناس دوول بيقولوا كدة على سبيل التهوين عليك والتخفيف عنك..

وانا مش فى حاجة لأن اعرفك بصفات شعبنا المصرى الجميل..

__________________________

إوعى تكون مقاطع مدونتى؟؟؟؟

يهمنى رأيك فى التوبيك اللى نزلتة ع الجروب....

رحــــيـل يقول...

اكتر حاجه بتضايقنى انى حد يتطفل عليه وانا عايشه حالة صمت
عارف محدش بيفهم ولا بيقدر وكل واحد بيكلم من وجهةة نظره الخاصه وانه شايف ان الامر مايستاهلش

انا دايما اقول ان ذكرياتنا اللى احنا عاوزين نحكيها عن نفسنا واحنا مثلا عندى 60 سنه احنا اللى بنصنعها الوقتى

لازم كل حد يكون زى ماهو عايز يحكى عن نفسه كمان سنين

انا كمان بقيت ماشيه بمبدأ مش فارقه كتير وبعمل دماغ لا مبالاه كل يوم
وبشرب حبوب طناش للدنيا واللى فيها

على فكره هى فعلا الدنيا متستاهلش بس هو احنا مش بنقدر نتحكم فى احزنا

تحياتى وتقديرى لك

أحمد عبد اللطيف يقول...

صديقي شادي
أنا أقصد الندم الذي يتوقف عنده الانسان يندب حظه ، فلا ينتبه لنوافذ أخري مفتوحة ، أما بالنسبة للندم بمعني التعلم من الأخطاء فهو مطلوب .
تحياتي لك

حمامة يقول...

نعم هي حياة واحدة تكون في بدايتها كالصفحة البيضاء كل شخص يخط فيها ما يريد فالتصرفات هي الحروف والأفعال هي الجمل التي يقوم كل شخص منا بكتابتها في صفحتة ’ صحيح أن هناك عوارض قد تغير من الخطط التي ننوي تنفيذها ولكن نظل نحن وحدنا المتحملين لمسؤلية أي كلمة أو عبارة نخطها في ورقاتنا


تعرف

انا ملقتش اجمل حته اقتبسها واعلق عليها لان البوست كله فظيع

تعرف يا شادى ومن غير زعل

دى اجمل حاجة كتبتها وانا قرتهالك لحد دلوقتى بجد بجد فظيعه :)

كنت كاتبة حاجة فيها شبه من كده
فعلاً حياتنا عبارة عن صفحة
واحنا عبارة عن شخابيط
حتى لو كانت وحشة فهى دى اللى كونتنا
وكلها تجارب ف الحياة

انا كمان مبحبش كلمة الحياة متستاهلش
لو كده يبقى احنا عايشنها ليه بقى ؟

كفاية اننا عايشينها علشان نعبد ربنا ونعمر الارض

تسلم ايدك يا فنان :)

بسنت يقول...

مش عارفه بس احيان كتيره بقول فعلا الحياه ما تستاهل كل اللى واحد عامله عشانها دا فى الاخر مترين فى مرتين وعمللك وبس
انا اول واحده بقول لاى حد زعلان الحياه ما تستاهلش اللى عاملاه او اللى عامله دا

هى يمكن الحاجات الى بتأثر فينا او هتحدد مصيرنا تستاهل
بس بردوا بعد فتره بلاقى كل الحاجات بتتساوى
مش عارفه دى نظره تشاؤميه ولا واقعيه
بس هى وجهات نظر اكيد

قهوة بالفانيليا - شيماء علي يقول...

الله ينور عليك :)
انا بتضايق اوي لما حد يقولي ان الحياة مش مستاهلة كل دة .. و خديها ببساطة ..!
الحياة دي هنعيشها مرة واحدة و مادام هتعيش مرة واحدة يبقى لازم تعيشها صح..!
او على الاقل تحاول تبقى صح .. تعرف طريق الصح .. اي حاجة فيها صح يا اخي !!

شكرا للمقال :)

سهــى زكــى يقول...

مش عارفة ليه ببقى من اخر الناس اللى بيعلقوا مع انى من اول الناس اللى بتقراه فى الدستور يوم الثلاثاء بالليل على فكرة او بالكتير الصبح وانا رايحة الجورنال
بجد الشغل دا مهم جدا وكنا محتاجينه جدا
الحياة تستاهل اوى تستاهل لاننا بنتنفس لسة وبنحلم لسة وبنحقق الحلم لسة
لكن وقت ما يتوقف واحد من دول تبقى الحياة عمرها ما تستاهل يا صديقى
وانا شايفة انك لسة بتتنفس ولسة بتحلم وبتحقق حلمك حتى ولو ببببببببببببببطء شدييييييييييد
بس بيتحقق وهايتحقق ولسة يا شادى

شادي أصلان يقول...

كراكيب أستاذه نهي محمود
ابتسمت لانك تتبني نفس وجهة النظر ... الحمد لله
متفق معاكي تمام ان الاخطاء تبدو جميلة لانها بتوضح حاجات كتير اوي
جميل طريقة قرايتك دايما لكلامي بتضيف ليا الكثير اوي
تحياتي

شادي أصلان يقول...

الريم
ياستي متأسيفين للأزعاج
ومتأسفين علي الاستفزاز
بس للاسف مدونتي معنديهاش موبيل علشان الي يوحشها يسلم عليها
تحايتي وبجد مش هزار تعالي تاني وقولي تعليقك

شادي أصلان يقول...

دعاء مواجهات
صباحك انتي كمان استثنائي
الناس الي بتقول علي سبيل انها تهون علي الناس ماشي وعلي عيني وراسي
انما الي بيقولوها وهما مقتنعين بيها دول بأه مش علي عيني ولا علي راسي خالص

شادي أصلان يقول...

رحيل
بتفق معاكي في الجزء الاول من كلامك
اما الجزء اسمحيلي لا الحياة تستاهل كتير وبطلي تعملي دماغ اللامبالاه دي ماشي .

شادي أصلان يقول...

احمد عبد اللطيف
كدا أشطاط أوي يا صديقي
تحياتي بجد.

شادي أصلان يقول...

حمامة
قرايتك تزيد الكلام جمالا
اما بقي حكاية انك تشوفي ان دي احلي حاجة انا كتبتها واحلي حاجة انتي قريتيها فهذا شيء لا يدعو للأسف .
ربنا يخليكي تحياتي

شادي أصلان يقول...

بسنت
في الاخر هما مترين في مترين وعملك.؟
ماشي بس دي فلسفة وحشة
لانك لازم تبقي فاكرو كويس ومتنسيش
اعمل لدنياك كانك تعيش ابدا
واعمل لاخرتك كانك تموت غدا
صح ولا ايه؟

شادي أصلان يقول...

قهوة بالفانيليا
وينور عليكي انتي كمان

على الاقل تحاول تبقى صح .. تعرف طريق الصح .. اي حاجة فيها صح يا اخي !!

صح اوي اوي كمان
خليكي بقي قافشة في الموضوع دا

شادي أصلان يقول...

أستاذة نهي زكي
حضرتك تيجي في اي وقت ا فندم
انا عارف انك متابعة الشغل

نيجي بأه للرد
انا لما قريت ردك لاقيت شبح ابتسامة اترسم علي وشي
انتي كمان ربنا يحققلك كل احلامك
ادعيلي معاكي
وقولي امين

الريم يقول...

شادى مدونتك مش مستفزة بالعكس ديه جامدة اخر حاجة وواضح انك ليك جمهور عريض من المدوننين لانى كل مادخل مدونة اشوفك هناك بس غير صورتك عشان شكلك حزين اوى فيها عنييك فيها حزن عميق

غير معرف يقول...

انا معاك جدا ان فى حاجات كتير فى حياتنا تستاهل ان احنا نقف عندها شوية ونحسب حسابات كتير عشانها ولو معملناش كده حنحس ان الحياة كلها مالهاش لزمة اصلا
بس عارف فى حاجات بيبقى لازم نكبر دماغنا منها علشان نعرف نعيش يعنى مش مفروض ان اى حاجة تاخد اكتر من وقتها وتعدى علشان الحياة تمشى
اسلوبك كان حلو جدااااااا وعجبنى اوىىىىى
ضحى

ســـــــهــــــــــر يقول...

الحياه من وجهة نظر كل واحد لازم تستحق الوقت و التفكيرو الجهد المبذول للوصول للغايه او الاقتراب منها
انا لحد هنا معاك و مش مع طبعا اللى بيقول انها متستاهلش عشان يلهيك

لكن خلينا نشوف من وجهة نظر الاخر يمكن هو شايفك غارق فى الحزن ف شىء مش هيرجع و عاوزك تخرج من احزانك و تلتفت للجديد و الجاى عشان ما تبقاش ضيعت الللى فات و القادم فى اللى فات

او يمكن مش قادر يفهم حالة تاملك او حتى حزنك المؤقت و استغراقك فى الصمت اللى بيكون ساعات تفكير و ساعات تامل و ساعات هدنه مع النفس و ( hold) لاى تاثير من احداث حواليك

فى الاخر متفقه معاك ان الحياه تستاهل و نص

أ شادى
بيعجبنى جدا طريقة عرضك للافكار
تحياتى

مصطفى السيد سمير يقول...

اكيد الحياة تستاهل حتى بالنسبة للي بيقول لك الكلام دة
هو كما بتعدي عليه لحظات صمت وعدم رغبة في الكلام وتيجي انت تقول له الحياة ماتستاهلش ممكن هو كمان يبص لك ويكتب موضوع زي دة

شادي أصلان يقول...

أستاذه سهي زكي
انا بعتذر بشدة عن الخطأ الكتابي في كتابة أسمك
بجد متأسف جدا جدا

شادي أصلان يقول...

الريم
شكرا ياستي والحمد لله ان ليا مدونين كتير أصحابي وأصدقائي اما بالنسبة للصور ف الحزن الي فيها مش مقصود خالص
وبصراحة هي عجباني
بس انتي بردو مقولتيش تعليق مع انك كنت رافضة طريقة التعليق الي مفيهاش جديد
انا مستني بردو التعليق بتاعك

شادي أصلان يقول...

ضحي
صح في حاجات مش عايزين نقف عندها كنير
بس شفتي انتي قلتي ايه؟
مش عايزين نقف عندها كتير
يعني لازم نقف وبعدين نحدد هنقف كتير ولا مش كتير
صح؟

شادي أصلان يقول...

سهر
شكرا لتعليقاتك لانها فعلا بتكون مميزة
انا طبعا عارف ان في ناس بتقول كدا وهما قاصدين الخير
بس انا اقصد الناس الي هما بيكونو مقتنعين بكدا يعني

تعليقات مميزة من صاحبة قلم مميز
تحياتي

شادي أصلان يقول...

مصطفي السيد
متفق كعاك تماما بس انا بقي مش ناوي ادي الفرصة لحد انه يكتب مموضوع زي دا واكون انا السبب فية

جوجو يقول...

شادى
السلام عليكم
شكرا كتير على الموضوع الجميل ده كلامك كله صح

غير معرف يقول...

صح لازم نقف فى الاول ونحسبها علشان تعدى باقل خسائر
يارب نعدى كلنا منها على خير واللى جاى ان شاء الله يكون احسن
ضحى

شادي أصلان يقول...

جوجو
عليكم السلام
الشكر ليكي انتي علي زيارتك الجميلة
ميرسي علي ذوك

شادي أصلان يقول...

ضحي
امين امين امين
بس ادعيلنا معاكي بجد

كراكيب يقول...

الحتة الأخيرة في البوست جامدة جدااا
اصلا اصلا انا هقولك بقى على حاجة
انا مسكت الجرنان وعمالة اقرا المقالة ومش كنت بصيت مين اللي كاتبها
ولوحدي لوحدي من غير ما حد يغششني في وسط ما انا عمالة اقرا كدة قولت ده شادي اصلااااان
وطلعت فظيعه وصح
نتعلم ايه بقى من الحدوتة دي
ان طريقة كتابتك مميزة وبتتعرف لوحدها وده في حد ذاته حاجة حلوة جداااا على فكرة

شادي... عقبال ما اشوفلك كتاب كدة في المعرض بإسمك و مكسر الدنيا
شادي... بيس!!

•√أريـ السمر ـج√• يقول...

جميل جداً المقال .. و طبعا الحياة تستاهل لانها رحلتنا الخاصة و بتكون مرة واحدة و بدون توقف .. و كل لحظة بيها بتكون عد تنازلي .. اكيد لازم نحزن على احلام عدى وقتها و لازم نهتم باحلام بنحاول نحققها و لازم كمان نعيش اوقات السعادة بنفس الاهمية .. كل شىء في حياتنا يستاهل و لكن للأسف مش كل الناس بتستوعب ان كل منا له حياته و اولوياته الخاصة بيه


دمت بكل الخير

شادي أصلان يقول...

كراكيب
ايه الكلام دا كله ليا انا انتي كدا مش هتعرفي تكلميني تاني
ربنا يسهل واسعي بكل جهدي ان يكون أسلوبي فعلا مميز ومختلف .
تحياتي

شادي أصلان يقول...

اريج السمر
مبسوط أوي بقرايتك الجميلة لكلامي وسعيد بزيارتك
تحياتي

Bascotaaa يقول...

فكثيراً ما نقابل أشخاص ونؤمن بهم أو هكذا نعتقد ونتبعهم ونأخذهم شيوخاً لنا ...........فلا نستطيع التخلص منها ولا نستطيع الرجوع لتغيريها وياليتها كتبت بالقلم الرصاص ففي تلك الحالة فقط قد نستطيع محوها
.............
عزيزي شادي
طبعا الحياة تستاهل ..كده واكتر من كده
..أحييك علي النص
واستوقفتني كتير الجملة اللي فاتت بالذات ..
شوية أقول لنفسي .. لأ ..فيه ناس بنمحيهم بجد ..لما بنكتشف تأثيرهم المضلل بنمسحهم بأستيكه
وشوية اقول لأ ..بيفضل منهم شيء ..لكنه مش شيء يملك القدرة علي التأثير فينا تاني , إنما إشارة تنبيه تخلينا مانتخدعش تاني بنفس الطريقة ..بطريقة تانية ..جايز !!

زى الهوا يقول...

على فكرة هوه اصلا اللى بيقول كدة قصده إن الحياة فانية ومش هتاخد منها حاجة ,وبالتالى الموضوع مش مستاهل إننا نقعد زعلانين ونمضى فترات طويلة من حياتنا القصيرة فى حزن , دى وجهة نظرى

شادي أصلان يقول...

bascottaa
جميل اننا متفقين في وجهة النظر الي بتقول ان الحياة تستاهل اننا نعمل علشانها الكثير
بس صدقيني في ناس ولا بنقدر نمحيهم ولا نمحي تأثيرهم
ومتفق معاكي تماما بردو اننا ممكن ننخدع بطريقة تانية لاننا بشر مش كدا بردو ولا ايه؟!

شادي أصلان يقول...

زي الهوا
متفقين ان الحياة فانية ومينفعش اننا نقضيها في حزن
انما المقصود حاجة تانية خالص
لان في فرق كبير بين الحزن وبين التفكير ومحاولة السعي لتحقيق الاحلام والطموح
ودا شيء ولا هو حزين ولا يحزن ولا يخلي الي حواليكي يحزنون
يبقي لانها فانية لازم نفكر صح ازاي نبقي خرجنا منها كسبانين صح ولا ايه؟!

Abozikas يقول...

تستاهل

شادي أصلان يقول...

ابو زيكاس
مهي دي المصيبة اني عارف اني استاهل
بس متقولهاش وانت بتضحك كدا لانك انت كمان تستاهل مش كدا بردو