الأربعاء، 24 يونيو 2009

اسكندرية ... دمياط


النهاردة قابلت في الشارع اتنين شباب معرفهمش ولا عمري شفتهم بس هما كانوا شبه بعض جداً مع ان شكلهم مختلف عن بعض خالص، وكانوا بيتكلموا عن واحد تالت مش موجود معاهم ودار بينهم الحوار التالي هحاول أنقله زي ما هو من غير أي تدخل مني ....


الأول : الواد خالد فين بقالي كام يوم مش بشوفه وبرنله وهو مبيعبرنيش متعرفش أي حاجة عنه؟.

الثاني : ياعم خالد شد علي إسكندرية الجو حر هنا والحياة هناك أجمل .

الأول : يا راجل طب والله كويس .. اه ما هو خلص إمتحانات وهيصيع براحته بأه، بس هو سافر إسكندرية ولا دمياط؟؟؟

الثاني : لأ هو سافر دمياط .. بس عادي يعني مش فارقة .

الأول : ايوة صح مش فارقة وكمان الجو هناك أظرف من هنا .

الثاني : بكتيييييييير .


وبعد كده سمعت صوت الصمت مني ومنهم ومن الدنيا كلها وكأني إنفصلت عن العالم كله وفضلت كده لحد ما روحت بيتنا وأنا بقول لنفسي لو حد سألني إنت ساكن فين هقوله في مدينة نصر وبما إنه عارف إني من إمبابة هيسألني مدينة نصر ولا إمبابة هقوله لأ إمبابة بس عادي يعني مش فارقة .

هناك 18 تعليقًا:

كلام على بلاطة يقول...

تحياتى

حمامة يقول...

مش عارفه ليه ضحكت :D

يمكن لن الحياة بالنسبالي بقت نكتة

او يمكن من كتر النكد الواحد بيضحك وخلاص

بس على فكرة يعني ...

هي فعلاً فعلاً فعلاً


مش فارقه :)


ازيك يا شادي ؟ لسه فاكرنا ؟:):)

كراكيب يقول...

ههههههههههههههههه ايه الجنوووووون دااااااااه

استنى يا عم انت يا عم لما اروح اقرا البوست اللي قبل ده

ههههههههههههههه هو انا بضحك كدة ليه
:)

miro el niro kwaniroooo

أبو العريف يقول...

هو انا حاسس انك عايز تقول حاجه

بس ايه هي
دا اللي نفسي اعرفه
عموما انا هقرأ تاني
يمكن افهم





وجدتها

العجل في بطن امه

تحياتي

r يقول...

مش عارفه شفتها فارقه
تعرف انك تكون فى مكان وروحك فى مكان اخر
نقول ان المكان التانى به الاصل به الاهل
وممكن نقول فيه الطفوله

اكيد هتفرق كتير
لان الجديد بيكون كل اللى فيه جديد
ويحتمل اى شئ

بالنسبه لدمياط واسكندريه
فارقه بردوا
واللى مش فارق هو خالد اللى ما سأل عن اصحابه او فكر انه يقولهم راح فين

فى مقوله ظريفه لعمر طاهر لسه قرياها بيقول
ان الصداقه اكتر شئ يستحق نعيد النظر فيها كل فتره

واضيف ليها المكان اللى بنعيش فيه

دمت بخير

الكلمة نور يقول...

رايح ابوقير يا حاج؟
لا يابنى والله .. رايح ابوقير
طيب كويس يا حاج اصل انا افتكرتك رايح ابوقير...خدنى معاك

Ahmed Othman يقول...

لو انك تقصد رصد ظاهرة
(مش فارقة )
بين الشباب
فهي ظاهرة تستحق الرصد و التحليل
من امثلة
وشها زي ضهرها
و كله عادي
و مش فارقة
.
.
.
.
سعدت اني عرفت انك تقطن بامبابة
ربما لأنها مهد طفولتي

key of life يقول...

جميلة وحلوة
كلمتين بمعنى واحد فمش فارقه :)
وأعتقد أن روتين حياتنا فرض علينا
أنها مش فارقه في أي حاجه
سلام

ســـــــهــــــــــر يقول...

حسيت انى بتراودنى امنيه
ان كان صوت الصمت يدوى من قبل حوارهم

هى موجة الاحباط و اللامبالاه مصاحبه لموجة الحر و لا دى موجه مستقله

engy يقول...

الظاهر فعلا ان كله زى بعضه وبجد مبقتش فارقه هنا زى هناك زى كله
واللى فارق هو كمان مبقاش فارق
بمعنى اصح كله محصل بعضه

Omnia يقول...

D:
الصراحة أسكندرية جواها يجنن دلوقتي
بس صدقني
مش فارقة يعني
مساء الخير :)

mohamed tarek يقول...

أحييك علي كلمة " شبه بعض " دي يا شادي..
للأسف .. هما شبه بعض زي ما فيه ناس كتير بقت شبه بعض

hasona يقول...

السلام عليكم

هو كل حاجة أصبحت عادي

لأننا أصبحنا غير دقيقين

والمسافات كبيرة بينا

حـــلـــم كـــان يقول...

ههههههههههههههههههههههههههههه

معدتش فارقه انا لازام تتدقق فى كل حاجه كده

أسماء علي يقول...

ية بس يا شادي

انت ابتديت جملة عجيبة أصلا
بس هما كانوا شبه بعض جداً مع ان شكلهم مختلف عن بعض خالص

ههههههههههه
و بعد كده كملتها

بس تصدق مش فارقة

حلوة يا باشا

kareem azmy يقول...

ناس مذاكرة جغرافيا كويس قوي
ما شاء الله
اللهم لا حسد
دمياط .. اسكندرية .. مطروح

مش فارقة
هي مش الأرض كروية؟
تبقى مش فارقة

Ahmed Othman يقول...

اين انت

محمود يقول...

لا بس الحكاية نفسها فارقة.. فارقة كتير.