الاثنين، 9 يونيو 2008

بناء علي التاج الذي مررته لي سهي زكي


1- هواياتي : لو أعتبرنا أن القراية والكتابة مش مجرد هواية يبقي المزيكا - والرغي مع أصحابي - والسينما .


2 - أشهر عيوبي : ياا سؤال أعتقد أنه صعب جدا بس أقدر أقول إني لما بقفش بكون رخم أوي ومندفع وبيتهيألي بردو أن دا متروك لرؤية الناس زي المميزات الي ممكن تكون فيا بالظبط .


3 - حاجات بكرهها جدا - الفتي بمعني أن تتعامل مع الناس الي عارفين كل حاجه ومعندهمش شغلانة غير أنهم يفتوا في الي بيعرفوه والي معندهمش فكرة عنه .


4 - حاجات بحبها قوي ومش بمل من تكرارها : القراية وقعدة القهوة والأفلام الكويسة دا أنا مرة أتفرجت علي أفلام ورا بعض بما يعادل حوالي 14 ساعة متصلة ( علي فكرة بجد مش هزار ولا فتي :) ) .


5 - سؤال بيستفزني جدا : لما حد يسألني عن درجة تدين حد تالت ( مربي ذقنه مثلا ) ولا أنا ولا هو لينا حق اننا ننظر لمستوي دينه ببقي نفسي أخنقة .


6 - أمنيتي في الحياة - أن الحياة بس تبقي حلوة للناس كلها ( بسيطة هه؟ ) .


7 - حاجات مؤمن بيها جدا : علي الرجل أن يقوم بما علي الرجل أن يفعله ......... ويسيب الباقي علي ربنا .


8 - أكتر حاجة فاشل فيها : الأجتماعيات العائلية مع إني والله مش بكون قاصد خالص يعني مع أصحابي إجتماعي جدا مع قرايبي غصب عني مش بتكلم كتير ولا بودهم باستمرار مع ان ناس كتير بتقول عليا إجتماعي جدا .


9 - وظيفة بحبها : أحب قوي اني اكون صحفي بس ....بنيو لوك هقولكم عليه بعدين .


10 - أخيرا وصلت للنهاية مثلي مثلي الأعلي في الحياة :

طبعا أبويا مثل أعلي كبير اوي بالنسبة ليا لاني اتعلمت منه كتير وأمي كمان مثل أعلي مهم في مراحل عمري المختلفة كمان خالي الكبير ( مش عايز أكون زيه بالظبط بس عاجبني قوي نجاحه في حياته ) ويجعلة عامر .


أمرر التاج ل :
أسماء علي

شادي زلط

سارة ( مهرة حرة )

دعاء ( مواجهات )

عبير (عاشقة القمر )







هناك 40 تعليقًا:

د\أسماء علي يقول...

أوووووووول حد با حجز مكان الأول
:)))))

د\أسماء علي يقول...

بعد ماحجزت مكان
يالهووووووووووي
شادي انا مش وانا باكلمك قولتلتك مش تمررلي التاج
انت مصمم تدبسني ياابني ؟
.......
اجابتك هي انت فعلا
عيوبك: على فكرة عيبك الأكبر انك حد طيب ف دنيا مش عايزة الطيبة دي
بس بجد بقى يا شادي
جاوبت بصدق رهيب
ماانا عرفاك بقى
منور التاج
وبالنسبة ل تاجي انا باقول اختفي اسهل من اني ارد عليه

عاشقة القمر يقول...

اييييييييييه ده .. يعني انا معدية كده بالصدفة ولا بيا ولا عليا ابص الاقيني متدبسه هنا من غير ما حد يقولي .. ليه كده يابني انا عملتلك ايه بس .. هو انا لحقت اخد نفسي من اسئلة الامتحانات :)
اتصرف ازاي انا دلوقتي طيب .. اعمل ماجيتش هنا D:
هو المفروض اني اخد الاسئلة دي وارد عليها مش كده .. تقريبا
اوك اوك .. انا هاخدهم واحاول اجاوب .. ربنا يستر .. ولن انسى لك هذا الموقف يا شادي .. ماااااااشي
D:

د/أبويحيى وادم يقول...

السلام عليكم ورحمه الله وبركاته

كم هى جميله تلك الاجابات

ومن اجمل الاشياء

على الرجل ان يقوم بما يفترض عليه ويترك الباقى لله

جميل ان نحب مهنتنا ونحب التميز بها

ربنا يوفقك يارب ويحقق لك كل احلامك

والسلام عليكم

emo يقول...

الله عليك يا شادى
ربنا يوفقك ديما
وميحرمناش من كلامك
وعلى فكرة بقى انت ليك تاج عندى ابقى عدى كدة وخده
سلام

شادي أصلان يقول...

سمسمه نورك بجد بيغطي علي الدنيا كلها اول ما تيجي .
أنا بقي قلت اني مش همرر التاج ليكي؟
تصدقي مش فاكر عموما انا ممكن اعملك عرض خاص .
واتنازل عن سؤال او اتنين منهم
يعني تجاوبي علي سطر وتسيبي سطر .
اما بقي بالنسبة للطيبة
فشهادة احترمها جدا وافخر بيها ان سمسة صاحبة المكانة الخاصه اوي اوي اوي تقول عليا انا كدا
وحتي لو الدنيا مش محتاجه الطيبة فأنا محتاجها ياستي
ميرسي يا قمر علي انك متبعاني اوي كدا.

شادي أصلان يقول...

عاشقة القمر
انا مستني اجابتك واشمعني انا يعني معملتش الدوشة دي لما اتمرر التاج ليا
جاوبي والانكار مش هينفعك
خلي روحك رياضية

شادي أصلان يقول...

د / أبو يحي وأدم
بجد زيارتك لمودنتي المتواضعة اسعدتني جدا
وخصوا الذوق اللا متناهي في اسلوبك.
شكرا

شادي أصلان يقول...

emo
ربنا يخليكي يا ايمي ان شاء الله هروح عندك وهاخد التاج
وخلي بالك انتي ممكن تخدي التاج دا تردي عليه لو حبيتي

د\أسماء علي يقول...

كماااااان يا شادي بتعمل نفسك ناسي موضوع اني اتحايلت ان بلاش التاج
اهئئئئئئ
...
وعامة لا تتنازل عن سؤال ولا اتنين ولا غيره
انا هاتقبل قدري بشجاااااعة
....
الجميل اوي شادي
بص انا مش بحب الأسئلة أصلا ماانت عارفني
بس عشان خاطرك هاوافق على اي حاجة
..
هاروح اجاوب اهه

د/أبويحيى وادم يقول...

بيان رقم 3

وبدأت مسيرة الحملة ولن تتوقف بأذن الله حتى نرى ثمارها

(لغتي هويتي)
إلى كل الايجابيين المشاركين معنا ،إلى كل من تعاطف ورحب بحملتنا ولا يعلم ماذا يفعل حان وقت العمل الواجبات العملية 1- أنظر فى مدونتك التي تكتب بها جيدا وحاول ان تجعلها خالية من الألفاظ الأجنبية الغير مطلوبة ولها بدائل عربية جميلة وكذلك المنتديات وتعليقاتك وردودك على المعلقين لديك وأسمك الذى تظهر به المدونة عند التعليق
2- موضوعك القادم بالمدونة أو المنتدى أن شاء الله يكون باللغة العربية قدرالمستطاع فى نفس المجال الذى تكتب به ولمزيد من نشر الحملة يا حبذا لو كان عن اللغة العربية وهذه بعض المواضيع التي اخترناها لك
0 تاريخ اللغة العربية 0 أثر تحول اللغة العربية إلى العامية على الهوية
0 بلاغة اللغة العربية 0 هذه مصطلحات غير عربية يجب الاستغناء عنها
0 مدى تأثير العربية في اللغات الأخرى 0 طرائف ونوادر في اللغة العربية
0 خواطر وأشعار حول اللغة العربية سواء من مكتوبك أو منقولك

3- هذه المواضيع المطروحة ما هي إلا مجرد أفكار لفتح باب التفكير و لك مطلق الحرية في اختيار مواضيع أخرى متعلقة بالأمر نفسه

4- إن قمت بكتابة موضوع بالفعل في الإطار الخاص بالحملة نرجوا إعلامنا به حتى نضع جميعا الرابط الخاص بالموضوع على المدونات ونجمع روابط كل المواضيع المتصلة بالحملة هنا بالمدونة
[Photo] قم بتفعيل الحملة بنشر الرسالة المتفق عليها لدى كل المدونات التي تعرفها وادعوهم للتفاعل معها وأشرح لهم الأسباب والهدف من الحملة
وفقنا الله جميعا وتقبل الله منا ومنكم صالح الأعمال

شادي أصلان يقول...

اسماء
بقي هتتنازلي وتردي علشان خاطري دي بجد حاجة تسعدني جدا
انا رايح بسرعة اهو اشوفك كتبتي ايه

كراكيب يقول...

شادي باشا.. مبروك عليك التاج ويارب كدة يارب تعمل كل اللي نفسك فيه وتشتغل صحفي بالنيولوك اللي يعجبك ويمشي على هواك

ميرو

د/أبويحيى وادم يقول...

السلام عليكم ورحمه الله وبركاته
حقيقة لم اجد طريقه للاتصال بك سوى الكتابه هنا بالمدونه فاعذرنى

كنا نرجوا من حضرتك تبنى امر الحمله فى الدستور ونشرها
حيث انها والحمد لله فى اقل من 48 تم نشرها فى اكثر من 75 مدونة و15 منتدى حتى الان وجارى عمل فريق على موقع الفيس بوك لذا نرجوا منك تبنى هذا الامر
وجزاكم الله خيرا واكرر اعتذارى على استخدام مكان التعليق فى هذا الامر
السلام عليكم

شادي أصلان يقول...

ميرو الف شكر علي زيارتك الي بجد جميلة
ويارب انتي كمان يجيلك التاج ونباركلك قريب

شادي أصلان يقول...
أزال المؤلف هذا التعليق.
شادي أصلان يقول...

د / أبو يحي وادم
انا لا انتسب للدستور هذا الكيان العظيم بشكل رسمي
انا انتسب له كقاريء اولا ثم كمشارك بسيط ثانيا ولذلك للأسف لا أمتلك المساحة ولا السلطة الكافية لتبني حملة مثل هذه
متأسف جدا ولكن هذا ليس بيدي
شكرا علي ثقتك الغالية وان شاء الله اقدر ادعم الفكرة بكل ما استطيع فعلة .
اما بالنسبة لمكان التعليق فمفيش اي مشاكل لان حملتك فعلا نبيلة .
تحياتي .

dodda يقول...

!!!!اممممم
التاج اثبتلى انك بكاش كتيييير

كله كده كلمتين وبس
مش تحكى كده وترغى...

ربنا يكرمك

!!! عارفة ... مش عارف ليه يقول...

اتوقع يا شادي
إن شاء الله قريب اوووي هتبقي صحفي جامد
لان دا واضح من دلوقت على كل بوستاتك

تحياتي

emo يقول...

متشكرة شادى جيدا
عندى تاج كمان ارد علية
واخد بتاعك على طول
تحياتى

سارورة يقول...

ياما انت كرييييييييييم ياااااااارب ، والله وحشتنى التاجات لدرجة انى كنت بعمل لنفسى تاج وكنت هنزله قريب .. احلى حاجة فى التاجات انها بتحسسك ان فى حد فى الدنيا فاكرك .. ربنا يخليك يا شادى ياااارب

نيجى بقى للتاج الفضيحة دا ، دا مش سايب حاجة ..
على فكرة انا عاملة زيك فى حكاية مع الاهل مكتومة دى .. مع اصحابى اخر مسخرة لكن فى العيلة صنم

يااااااااااااارب يا شادى يحققلك امنيتك فى الحياة (( ما هى فيها مصلحة للبشرية كلها هههههههههههه ))

ويااااااااارب نشوفك اجمد جورانليست باجمد نيو لوك

شادي أصلان يقول...

dodda
بكاش كبير
ياريتني كنت بكاش كبير مكانش بقي دا حالي !

شادي أصلان يقول...

عارفة مش عارف لية
ربنا يخليكي يارب
تحياتي انا كمان

شادي أصلان يقول...

ايمي
لا شكر علي تدبيسة
التاج دا تدبيسة
انا كنت عايز ابعدك عنها بس انتي حرة بقي !

شادي أصلان يقول...

سارورة
اهو جالك التاج لحد عندك ورينا بقي كدا شطارتك
بدل ما تعملي لنفسك واحد
مستني اشوف ردك عليه

maha miho يقول...

بجد ضحكتني اوي الحتة بتاعة الفتي
عندنا واحدة في الشغل كل لما تسمع حاجة وما تعجبهاش تقول: ايه الفتي ده
او تقول ايوه فتاية بالكهربا
فكرتني بيها
شادي أصلان،، كلامك بسيط وبيوصل بسرعة
مبروك ع اللي اتمررلهم وادينا كمان وكمان كلام من كلامك يا شديد

شادي أصلان يقول...

مها ميهو
اسمحيلي اشكرك واهديكي التاج دا لو تحبي تجاوبي عليه انتي كمان

سهــى زكــى يقول...

شادى آصلان العظيم
والله العظيم انت عظيم يا استاذى ، اجابات بمنتهى البساطة والعفوية والعمق حقيقى والله من غير (فتى ) وبالمناسبة موضوع محمد منير فى الاسبوع دا رقيق جدا وحقيقى جدا ، اشكرك على تلبية النداء وربنا معى اللى انت مررت التاج ليهم ويوفقهم وينجح لهم المقاصد قادر يا كريم

على فكرة فعلا حبيت اجاباتك

شادي أصلان يقول...

استاذه سهي
بجد لا تتخيلي ما فعلة كلامك داخلي
اعتقد انني لا استطيع ان اجيب بأي كلام غير ان جمال روحك هو ما يؤهلك لان تقولي كلام مثل هذا
شكرا وشرف ليا ان كلامي يعجبك

mostafa rayan يقول...

علي فكرة انت انسان جميل قوي وصاحب صاحبك بجد
وان شاء الله تحقق كل احلامك وتبقي احسن صحفي في مصر
تحياتي وحبي لك

عاشقة القمر يقول...

عمو شادي عمو شادي انا اخدت التاج زي ما قولتلي وحليته .. انا شاطرة بقى .. هاتلي حاجة حلوة وانت جاي D:
تدبيسه قصاد تدبيسة التاج واحدة بواحدة يا باشا D:

شادي أصلان يقول...

مصطفي ريان
ربنا يخليك اخجلني حقا اطرائك
شكرا لزيارتك مدونتي التي ما زلت تخطو خطواطها الاولي وان شاء الله تجوم الزيارات

شادي أصلان يقول...

عاشقة القمر
ماشي هحيبلك كباية كاكاو وانا جاي
بس انا بصراحة خايف اجي

عاشقة القمر يقول...

اولا انا قولت حاجة حلوة مش حاجة سخنة .. بعدين خايف تيجي ؟؟؟؟؟ يانهااااااااار ليه ؟ .. هو انا حاطة كلب على باب المدونة ولا ايه :)

اميمة عز الدين يقول...

فعلا لا احد وصى على الاخر ولسنا مؤهلين لان نكون قضاة نصدر احكاما على الاخرين
تدين الشخص لنفسه امام رب العالمين يستفيد منه لما ينزل قبره ويترك وحيدا وحيدا الا من عمله , بالطبع سوف يستفيد الاخرون من تدينه لان كم الشر سوف يتناقص
تحياتى
اميمة عز الدين

شادي أصلان يقول...

عاشقة القمر
انا مش خايف من الكلاب انا خايف من تقديمة التاج الي اكيد هيكون فيها اسمي زي كل الناس الي ردو عليه .

شادي أصلان يقول...

اميمة عز الدين
جميل اوي انك فسرتي ووضحتي كلامي في النقطة دي لانها حاجه مهمه جدا
تحياتي
اتمني الزيارة تتكرر

shimooo يقول...

احم...

تعريف كويس بنفسك
معرفكش طبعا عشان انا بره مصر
لكن لما دخلت عالم التدوين عرفتك من المدونات

لازم انا عاملة زي الفراشه الي بتتشد للنور انا بقى بتشد للصحفيين..
عندي هوس ..وان كان لسه بدري عليا

ريهام شعيب يقول...

عجبتني اوي الاسئلة والاجوبة غير العادية طبعا تحية لروحك البريئة

انت اللي عامل اللعبة يا شادي اصدي من أختراعك الأسئلة ولا لعبة عامة ؟

ريهام شعيب يقول...

آسفة على سؤالي خلاص عرفت الاجابة من عمو جوجل لقيت اللعبة

تحية مرة كمان لاجاباتك المميزة